Bolqarıstan, Rumıniya və Türkiyə Qara dənizdə Rusiya və Ukraynanın hərbi əməliyyatları nəticəsində ərazi sularını minalardan təmizləmək üçün birgə bölmə yaratmağı planlaşdırır. Bu barədə Bloomberg mənbələrə istinadən məlumat yayıb.
Onların fikrincə, yeni bölmənin formalaşdırılması üç ölkənin Qara dəniz hövzəsində minalardan təmizləmə problemini müstəqil həll etmək bacarığını nümayiş etdirəcək. NATO-ya üzv olan digər ölkələrin də iştirak etmək planı yoxdur. Agentliyin qeyd etdiyi kimi, bölmə bir aydan gec olmayaraq formalaşacaq. Bloomberg yazır ki, Şimali Atlantika Müqaviləsi Təşkilatının fəaliyyətə başlamasından bəri ilk dəfə NATO ölkələri Qara dənizdə böyük bir tədbir keçirmək üçün qüvvələrini birləşdirəcək.
Sentyabrda NATO ölkələri Rumıniyada dəniz minalarına qarşı mübarizə təlimləri keçirib. Manevrlər Qara dəniz və Dunay deltasında baş tutub. Bolqarıstan, Böyük Britaniya, Rumıniya, ABŞ, Türkiyə, Ukrayna və Fransadan iki yüzdən çox hərbi dənizçi iştirak edib. (Tass)
