Müxalifət partiyalarının “Qələbə” blokunun lideri İlan Şor noyabrın 3-də keçiriləcək prezident seçkilərinin ikinci turunda Moldova seçicilərini hazırkı prezident Maia Sanduya qarşı səs verməyə çağırıb.
“Sabah bizi həlledici döyüş gözləyir, səssiz qalmayın Sandu isterikdir və şantaj, axtarışlar, həbslərlə hər kəsi qorxutmağa çalışır”, – Şor Telegram kanalında yazıb.
Moldova Mərkəzi Seçki Komissiyasının məlumatına görə, oktyabrın 20-də keçirilən seçkilərdə Sandu 42,49 faiz səs toplayıb, sabiq baş prokuror Aleksandr Stoyanoqlo isə 25,95 faizlə ikinci tura onunla çıxıb. Bir neçə müxalifət partiyası hakimiyyəti xarici seçki məntəqələrində saxtakarlıqda ittiham edib və seçkinin nəticələrini mübahisələndirib. Sandu ilə birlikdə bu posta namizəd olan hər kəs ikinci turda ona dəstək olmaqdan imtina edib. ATƏT-in Demokratik Təsisatlar və İnsan Haqları Bürosunun müşahidəçiləri öz hesabatlarında diqqəti inzibati resurslardan istifadəyə və rəqibləri “qeyri-bərabər şəraitə” qoyan qanunlara düzəlişlərə yönəldiblər. (Tass)
