Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin 2 saylı psixonevroloji sosial xidmət müəssisəsinin sakinləri üçün ekskursiya təşkil edilib.Agentliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, ekskursiyanın məqsədi müəssisə sakinlərinin sosial adaptasiyasına dəstək verməkdən ibarətdir.Ekskursiya Şamaxıda yerləşən Nəsirəddin Tusi adına Şamaxı Astrofizika Rəsədxanasında təşkil edilib. İştirakçılar Rəsədxananın nəzdində fəaliyyət göstərən Astronomiya Muzeyi və teleskoplarla tanış olublar. Sakinlər muzeydə olan maraqlı eksponatlar və rəsədxananın tarixi barədə geniş məlumat alıblar.Sosial xidmət müəssisəsinin sakinləri Pirqulu kəndi ətrafında gəzintiyə də aparılıblar.Qeyd edək ki, Şamaxıda yerləşən 2 saylı psixonevroloji sosial xidmət müəssisəsi 2024-cü ildə yenidən qurulub və əsaslı təmir olunub. 174 nəfər üçün nəzərdə tutulan müəssisədə hazırda 107 nəfər müvafiq xidmətlərlə təmin edilir. Sosial xidmət müəssisəsinin sakinləri ilkin tibbi-sosial yardım, reabilitasiya xidmətləri, psixoloji və psixiatrik yardımla yanaşı keyfiyyətli ərzaq məhsulları, təmiz geyim və yataq dəstləri ilə təmin olunurlar.
