ABŞ-ın yeni seçilmiş prezidenti Donald Tramp yanvarın 20-də Ağ Evə qayıtdıqdan sonra Avropa Ukraynaya daha çox kömək etməli olacaq. Bu bəyanatla Böyük Britaniyanın Baş naziri Key Starmer çıxış edib.
“Bəli, düşünürəm ki, biz həqiqətən də [Ukrayna üçün] daha çox iş görməliyik”, – deyə hökumət başçısı Avropanın “ Politico” nəşrinə müsahibəsində bildirib.
“Mən tamamilə əminəm ki, yeni seçilmiş prezident Tramp ABŞ-ın münaqişənin həllində mühüm rolunu aydın şəkildə dərk edir” deyən Starmer, Londonun bu məsələdə Vaşinqtonla gündəlik olaraq işlədiyini və bunu davam etdirəcəyini də əlavə edib.
Starmerin sözlərinə görə, “Ukraynanın bütün digər müttəfiqlərinin hərbi dəstəyi artırması” və Vladimir Zelenskini Rusiya ilə mümkün danışıqlar üçün “ən güclü mövqeyə” qoyması “Kiyev üçün həyati əhəmiyyət kəsb edir”. Baş nazir, həmçinin Britaniyanın Ukraynaya sülhməramlıların göndərilməsi də daxil olmaqla, münaqişənin həlli üçün istənilən mümkün təşəbbüsdə “tam rol” oynamaq niyyətində olduğunu bir daha vurğulayıb. Baş nazir əlavə edib ki, qoşunların yerləşdirilməsi “uzunmüddətli, effektiv və çəkindirici olmalıdır”. (Tass)