Suriyanın yeni hakimiyyət orqanları Ənəs Həsən Xəttabı Baş Kəşfiyyat Xidmətinin rəhbəri təyin edib. Bu barədə dekabrın əvvəlində Suriya üzərində nəzarəti bərqərar etmiş silahlı müxalifətin birgə qüvvələrinin komandanlığının bəyanatında deyilir.
Xəttab Suriyanın “Cəbhət ən-Nusra” terror qruplaşmasının liderlərindən biri olub. 2014-cü il sentyabrın 23-də BMT Təhlükəsizlik Şurası onu beynəlxalq terror təşkilatı Əl-Qaidə ilə əlaqəyə görə sanksiya siyahısına daxil edib. BMT-nin məlumatına görə, Xəttab İraqdakı Əl-Qaidənin rəhbərliyi ilə müntəzəm əlaqə saxlayıb, Suriya qrupunun maliyyələşdirilməsini təşkil etməyə, eləcə də onun silah təchizatına kömək edib.
Dekabrın 10-da Suriyanın yeni hakimiyyət orqanları Məhəmməd əl-Bəşiri müvəqqəti hökumətin başçısı təyin edib. Suriyanın yeni baş naziri təyinatını şərh edərkən ölkədə keçid dövrünün gələn il martın 1-dək davam edəcəyini bildirib. Əl-Bəşir bundan əvvəl Suriyanın İdlib əyalətində silahlı müxalifətin nəzarətində olan əraziləri idarə edən Xilas Hökumətinə rəhbərlik edib. (Tass)