Suriya prezidenti Bəşər Əsəd respublikanın Xalq Şurasına (parlament) seçkiləri iyulun 15-nə təyin edib. Bu barədə Suriya dövlət başçısının ofisinin yaydığı məlumatda deyilir.
“Prezident Əsəd Xalq Şurasına deputat seçkilərinin keçirilməsi haqqında fərman imzalayıb, səsvermə iyulun 15-də keçiriləcək”, mətndə deyilir.
Suriya Xalq Şurasına seçkilər 2012-ci il fevralın 26-da referendumla təsdiq edilmiş konstitusiyaya uyğun olaraq çoxpartiyalılıq əsasında keçiriləcək.
Xalq Şurası ümumi, birbaşa və gizli səsvermə yolu ilə dörd il müddətinə seçilən 250 deputatdan ibarətdir. Suriyada ərəb sosializmi qurulandan bəri qüvvədə olan fəhlə və kəndlilər üçün kvotalar konstitusiyaya görə dəyişməzdir. Onlara qanunverici orqanda 127 yer ayrılıb. (Tass)
