Naqoya Universiteti Tibb Məktəbində aparılan yeni tədqiqat “unikal səs stimullaşdırma texnologiyası”nın hərəkət xəstəliyinin simptomlarını əhəmiyyətli dərəcədə yüngülləşdirə biləcəyini ortaya qoyub.
AZƏRTAC “Science Daily” portalına istinadla xəbər verir ki, tədqiqat nəticələri “Environmental Health and Preventive Medicine” jurnalında dərc olunub.
Takumi Kaqava və Masaşi Katonun rəhbərlik etdiyi tədqiqat qrupu müəyyən edib ki, daxili qulağı xüsusi tezlikdəki səs dalğaları ilə stimullaşdıran bir cihaz hərəkət xəstəliyinə məruz qalan şəxslərdə ürəkbulanma, başgicəllənmə və ümumi narahatlıq kimi simptomları azaldır. “Sound spice®” adlandırılan bu texnologiya hətta cəmi bir dəqiqəlik stimullaşdırma ilə belə təsirli nəticələr göstərib. Tədqiqatçılar tərəfindən aparılan eksperimentlərdə həm siçan modellərindən, həm də insan könüllülərdən istifadə olunub. Onlar müəyyən ediblər ki, 100 Hz tezliyindəki unikal səs vibrasiyaları daxili qulağın otolitik orqanlarını stimullaşdıraraq balans və məkan oriyentasiyasına cavabdeh olan vestibulyar sistemin aktivləşdirilməsinə səbəb olur. Sürücülük simulyatoru və real avtomobil şəraitində keçirilən testlər göstərib ki, stimullaşdırmadan əvvəl unikal səsə məruz qalan iştirakçılar daha az narahatlıq hiss edib və simpatik sinir sisteminin aktivliyində yaxşılaşma müşahidə olunub. EKQ göstəriciləri postural nəzarət və Hərəkət Xəstəliyinin Qiymətləndirilməsi Sorğusunun nəticələri stimullaşdırmanın effektivliyini obyektiv şəkildə təsdiqləyib.
T.Kaqava qeyd edir ki, istifadə olunan səs səviyyəsi gündəlik həyatdakı səslənmə mühitinin daxilində qalır və texnologiyanın həm effektiv, həm də təhlükəsiz olduğunu göstərir. “Qısa müddətli stimullaşdırmanın sağlamlıq riski minimaldır və istifadə olunan səs səviyyəsi iş yerindəki səs-küy təhlükəsizliyi standartlarından xeyli aşağıdır,” – deyə o bildirib.
Bu araşdırma səsin balans sisteminə olan təsiri ilə bağlı elmi biliklərə mühüm töhfə verir və hərəkət xəstəliyindən əziyyət çəkən milyonlarla insan üçün sadə, qeyri-invaziv və effektiv bir müdaxilə metodu təqdim edir. Tədqiqat qrupu texnologiyanı daha da inkişaf etdirərək hava və dəniz nəqliyyatı kimi müxtəlif səyahət şəraitlərində praktik tətbiqlərini genişləndirməyi planlaşdırır.