Fransa prezidenti Emmanuel Makronun Ukraynaya qoşun yeritməklə bağlı açıqlamaları 2024-cü ilin noyabrında keçiriləcək seçkilərdə ABŞ-ın keçmiş prezidenti Donald Trampın mümkün qələbəsi ilə bağlı qorxuları ilə bağlıdır. Bu fikri Eurasia Group analitik şirkətinin eksperti Müctəba Rəhman deyib.
“Makronu üç qorxu idarə edir: Ukraynanın cəbhə xətti dəyişə bilər; ABŞ-ın Konqres tərəfindən artıq dayandırılmış Ukraynaya dəstəyi noyabrda Donald Tramp yenidən seçilərsə, sona çatacaq; Qərb fəlakətli məğlubiyyətə doğru yuxuya gedir”, – o yazıb. .
Bundan əvvəl Makron Çexiya prezidenti Petr Pavellə keçirdiyi mətbuat konfransında bildirib ki, məğlubiyyət əhval-ruhiyyəsinin yayılmasının qarşısını almaq üçün Avropa ölkələri Ukraynaya kömək etməkdən danışarkən özlərinə məhdudiyyət qoymamalıdırlar. Bunun fonunda Makron Ukraynaya hərbi yardımın göstərilməsinin vacibliyini vurğulayıb və Çexiyanın Avropa İttifaqından kənar üçüncü ölkələrdən artilleriya mərmiləri almaq təşəbbüsünü dəstəklədiyini bildirib.
Fevralın 26-da Parisdə Ukraynaya həsr olunmuş konfransın yekunlarına görə, Makron Qərb ölkələrinin quru qoşunlarının xüsusi hərbi əməliyyat zonasına göndərilməsinin mümkünlüyünü birmənalı olaraq istisna etməyib. Fransa prezidenti həmçinin bildirib ki, Qərb dövlətləri Rusiyanın bu münaqişədə üstünlüyü əldə etməməsi üçün “lazım olan hər şeyi etmək niyyətindədir”. Martın 17-də dərc olunan Le Parisien- ə müsahibəsində Makron bildirib ki, nə vaxtsa Ukraynada “Rusiya qüvvələrinə qarşı” quru əməliyyatları keçirmək lazım gələ bilər.
(Tass)