Bakıdakı 132-134 nömrəli Təhsil Kompleksində görkəmli alim, filologiya elmləri doktoru, istedadlı pedaqoq, tərcüməçi, ictimai xadim, professor Aida İmanquliyevanın anadan olmasının 84-cü ildönümünə həsr edilən tədbir keçirilib.
AZƏRTAC xəbər verir ki, tədbirdə Təhsil Kompleksinin direktoru, Əməkdar müəllim Sara Xanlarova məktəbin məzunu, böyük şərqşünas-alim Aida İmanquliyevanın elmə, təhsilə verdiyi töhfələrdən danışıb. Qeyd olunub ki, Aida xanım şərəfli ömür yolu keçib, şərqşünaslıq elminin inkişafında onun müstəsna xidmətləri olub.
Professor Aida İmanquliyevanın ərəb mühacirət ədəbiyyatına dair əsərlərinin əhəmiyyətindən bəhs edən S.Xanlarova onun üç monoqrafiyanın (“Mixail Nuayme və Qələm Assosiasiyası”, “Cübran Xəlil Cübran”, “Yeni ərəb ədəbiyyatının korifeyləri”), müxtəlif mövzularda elmi məqalələrin müəllifi olduğunu bildirib.
Sara Xanlarova professor Aida İmanquliyevanın 132 nömrəli orta məktəbi qızıl medalla bitirdiyini vurğulayıb. Bildirilib ki, Aida xanım həm də qayğıkeş ana, gözəl pedaqoq, bacarıqlı tərcüməçi, parlaq şəxsiyyət idi.
Sonra görkəmli alimin həyat və fəaliyyətindən bəhs edən film təqdim olunub.
