1893-cü il Durand xəttinə əsaslanan Əfqanıstan və Pakistan arasındakı sərhəd “xəyali xətt”dir. Bunu radikal Taliban hərəkatının yaratdığı müvəqqəti Əfqanıstan hökumətində xarici işlər nazirinin müavini Şer Məhəmməd Abbas Stanikzai deyib.
“Biz heç bir halda xəyali Durand xəttini rəsmi sərhəd hesab etmirik və keçmişdə heç bir əfqan onu sərhəd hesab etməyib”, – o, Əfqanıstanın “Haşt- e Subh” qəzetinə istinadən bildirib.
Bundan əvvəl Taliban hökumətinin sərhəd və qəbilə işləri üzrə naziri Nurullah Nuri bildirib ki, “Əfqanıstanın Pakistanla rəsmi sərhədi yoxdur”. Fevralın 9-da Pakistanın o vaxtkı baş naziri vəzifəsini icra edən Ənvar-ul-Haq Kakar Əfqanıstanın TOLOnews telekanalına müsahibəsində Durand xəttinin “iki dövlət arasında beynəlxalq səviyyədə tanınmış sərhəd” olduğunu deyib.
Əfqanıstan və Pakistan arasında dövlət sərhədinin tanınması ilə bağlı mübahisə dünyada ən uzun sürən mübahisələrdən biridir. 1893-cü ildə Kabildə Əmir Əbdürrəhman Xan və ser Henri Mortimer Durand tərəfindən Britaniya və Əfqanıstan mülkləri arasında sərhədin delimitasiyası haqqında saziş imzalandı. 1947-ci ildə Britaniya Hindistanı dağılana qədər Əfqan hökmdarları Durand xəttini sərhəd kimi tanısalar da, 1947-ci ildən müstəqil Pakistanın yaranmasından sonra Kabil bu xətti rəsmi sərhəd kimi tanımır. Əfqanıstan-Pakistan ərazi mübahisəsi tez-tez sərhədyanı ərazilərdə silahlı münaqişələrə və qiyamlara səbəb olur. (Tass)
