Livan prezidenti Cozef Aun, baş nazir Nafaff Salam və parlamentin spikeri Nəbih Berri arasında yaranan fikir ayrılığı respublikada yeni hökumətin qurulmasını ləngidib. Bu barədə TASS-ın müxbirinə Baabdadakı prezident sarayındakı mənbə bildirib.
“Şiə icmasının siyasi lideri olan spiker Berri baş nazirin təqdim etdiyi 24 nazirdən ibarət siyahını təsdiqləməkdən imtina edib”, – deyə mənbə qeyd edib: “Əsas səbəb onun inzibati inkişaf naziri Lamiyə Mobeyedin təklif etdiyi namizədliyi ilə razılaşmaması olub”.
Onun sözlərinə görə, Aun və Salam, öz növbəsində, spikerin bu nazir postuna təklif etdiyi hakim Abdel Nasser Ridanın namizədliyini təsdiq etməyib. “Nəticədə hökumət böhranı yaranıb, Berri, sonra isə Salam heç bir açıqlama vermədən bir-birinin ardınca sarayı tərk edib”, – mənbə bildirib.
Agentliyin həmsöhbəti yaranmış problemi “Amal” və “Hizbullah” şiə hərəkatlarının nazirlər kabinetində özlərinin beş nümayəndəsinin olması istəyi ilə izah edib ki, bu da gələcəkdə hökumət qərarlarının qarşısını almağa imkan verəcək. Prezident Aun və Baş nazir Salam, şiə kvotasındakı beşinci nazirin müstəqil olmasında təkid edirlər. (Tass)
