Donald Trampın rəhbərlik etdiyi administrasiya ABŞ-a idxal edilən Britaniya məhsullarına rüsumlar tətbiq edərsə, Böyük Britaniya müdafiə xərclərini əhəmiyyətli dərəcədə azaldacaq. Bu barədə Times qəzeti mənbələrə istinadən məlumat yayıb.
Nəşrin yazdığına görə, yüksək səviyyəli hökumət mənbələri xəbərdarlıq ediblər ki, Böyük Britaniya “Donald Tramp yüksək tariflər tətbiq edəcəyi təqdirdə müdafiə xərclərini milyardlarla dollar azaltmağa məcbur olacaq”.
Ekspertlərin proqnozlarına görə, xaricdəki tariflər Böyük Britaniyanın ÜDM-nin 0,9% azalmasına səbəb olacaq ki, bu da 2029-2030-cu illərdə müdafiə xərclərinin 1,82 milyard funt sterlinq (2,22 milyard dollar) azalması ilə nəticələnəcək. Oxşar ssenari Britaniya Parlamentinin İcmalar Palatasının Biznes və Ticarət Komitəsinin rəhbəri Liam Byrne-nin sifarişi ilə hazırlanmış hesabatda da yer alır.