Yaponiyanın Tokio Milli İnformatika İnstitutunun dosenti, Elektrik və Elektronika üzrə Mühəndislik İnstitutunun (The Institute of Electrical and Electronics Engineers – IEEE) baş üzvü Frederik Andres Azərbaycan Respublikası Elm və Təhsil Nazirliyi İnformasiya Texnologiyaları İnstitutunun baş elmi işçisi texnika elmləri üzrə fəlsəfə doktoru, dosent Şəfəqət Mahmudovaya əməkdaşlıq təklif edib.
İnstitutdan AZƏRTAC-a bildirilib ki, əməkdaşlıq çərçivəsində informatika, maşın təlimi, böyük verilənlər (Big Data), süni intellekt və digər qabaqcıl istiqamətlər üzrə birgə elmi tədqiqatların aparılması, həmçinin birgə elmi məqalələrin hazırlanması nəzərdə tutulur.
Frederik Andres beynəlxalq bazalarda indeksləşən çoxsaylı elmi məqalələrin müəllifidir. Hazırda tərəflər arasında ilkin əlaqələrin qurulması prosesi davam edir.