Amerika prezidenti Donald Tramp hesab edir ki, ABŞ-dan qeyri-qanuni miqrantların deportasiyası yaxşı gedir, ilk növbədə ölkədən qatı cinayətkarlar çıxarılır. Bu barədə Vaşinqton administrasiyasının rəhbəri Şimali Karolinaya gəldikdən sonra jurnalistlərə bildirib.
“Deportasiyalar çox yaxşı gedir. Biz dəhşətli, qatı cinayətkarlardan qurtuluruq. Bunlar qatillərdir, oradakı ən pis insanlardır. Biz əvvəlcə onlardan qurtuluruq”, – Tramp müxbirin sualına cavab verib.
Yanvarın 20-də Tramp ABŞ-ın Meksika ilə sərhədində fövqəladə vəziyyət rejiminin tətbiqi haqqında fərman imzalayıb. Amerika lideri bildirib ki, bu, ölkəyə qeyri-qanuni miqrantların “fəlakətli işğalını dəf etmək” üçün cənub sərhədinə qoşun göndərməyə imkan verəcək. Əvvəllər respublikaçı dəfələrlə immiqrasiya siyasətinin sərtləşdirilməsinin tərəfdarı olduğunu bildirib. O, qeyri-qanuni miqrantların deportasiyası üzrə Amerika tarixində ən böyük əməliyyatı təmin etmək niyyətində olduğunu bildirib.
Miqrasiya böhranı hazırda ABŞ-da partiyalararası mübarizənin əsas problemlərindən biridir. (Tass)