ABŞ-ın yeni seçilmiş prezidenti Donald Tramp avtomobil idxalına rüsum tətbiq etmək hədəsinə əməl etsə, bu, Avropa avtomobil sənayesində 25 minə qədər iş yerinin itirilməsinə və milyardlarla itkiyə səbəb ola bilər. Alman avtomobil istehsalçıları Volkswagen, Mercedes və BMW xüsusilə təsirlənəcək, Reuters Kearney konsaltinq firmasının araşdırmasına istinadən xəbər verir.
Mütəxəssisləri hesab edirlər ki, Avropa avtomobil istehsalçıları üçün potensial itkilər tariflərin nə qədər yüksək olacağından və avtomobil istehsalçılarının xərcləri alıcılara ötürüb-ötürməməsindən asılı olaraq 3,2 milyard dollardan 9,8 milyard dollara qədər ola bilər. Qeyd olunur ki, rüsumların tətbiqindən ən çox ABŞ-a 640 min avtomobil idxal edən Almaniyanın “Volkswagen”, “Mercedes” və “BMW” şirkətləri, eləcə də onların tədarükçüləri zərər çəkə bilər.
Kearney sözçüsü Nils Kuhlwein bildirib ki, orta müddətli perspektivdə yeni tariflər avtomobil istehsalçılarının daha çox istehsal gücünü xaricə köçürməsinə səbəb ola bilər, tədarükçülər də buna əməl edəcəklər.
Oktyabr ayında Tramp seçki kampaniyası zamanı bildirib ki, noyabrda keçiriləcək prezident seçkilərində qalib gələcəyi təqdirdə idxal rüsumlarını əhəmiyyətli dərəcədə artırmaq niyyətindədir. O, seçki platformasında istənilən malın idxalına 10 faiz, Çindən idxala isə 60 faiz, ABŞ-dan kənarda istehsal olunan avtomobillərə isə 100 faiz rüsum tətbiq etməyi təklif edib. (Tass)
