Ayyıldız Tim adlı bir qrup türk haker İsrail Müdafiə Nazirliyinin serverlərini sındıraraq, onun fəaliyyəti və nazirliyin şəxsi heyəti haqqında çox məxfi məlumatları əldə etdiklərini bildirib. Bu barədə qrupun X sosial şəbəkəsində (keçmiş Twitter) mesajında deyilir.
“Qrup İsrail Müdafiə Nazirliyi, o cümlədən davam edən təlimlər və şəxsi heyətlə bağlı çox məxfi məlumatlar əldə edib. Türklərin gücünü görəcəksiniz. Biz səssiz keşik çəkirik”, – bəyanatda deyilir.
Türkiyəli hakerlərin ən məşhur qrupu İsrail birjasını, ölkənin enerji infrastrukturunu və bəndləri hədəf kimi göstərib. Qrupdan başqa bir mesajda deyilir: “Hakerlər əmr gözləyirlər, gələndə hücumlar həyata keçiriləcək”.
TV -100 telekanalı xatırladır ki, Ayyıldız Tim əvvəllər Qərb və Rusiya dövlət qurumlarının serverlərini sındırıb. (Tass)
