Türkiyə və ABŞ Ankaraya Amerika F-16 qırıcılarının satışı və mövcud təyyarələrin modernləşdirilməsi ilə bağlı texniki danışıqları başa çatdırıb. Bu barədə jurnalistlərə Türkiyənin milli müdafiə naziri Yaşar Gülər məlumat verib.
“Biz 40 ədəd F-16 Block 70 təyyarəsi üçün satınalma prosesinin gedişini və ABŞ-dan 79 [F-16] təkmilləşdirmə dəstinin alınmasını izləyirik. ABŞ ilə texniki görüşlərimiz başa çatıb. Biz [ABŞ-dakı] həmsöhbətlərimizə bildiririk ki, biz bu məsələ ilə bağlı müsbət və konkret addımlar gözləyirik və ümid edirik ki, proses mümkün qədər tez başlayacaq”, – deyə CNN Türk telekanalı nazirdən sitat gətirib.
Gülər qeyd edib ki, “[silah] tədarükü kontekstində ən mühüm məsələ müttəfiqlərin bir-birinə qarşı məhdudlaşdırıcı tədbirlər tətbiq etməməsidir”. “Müttəfiqlər Türkiyənin qlobal və regional funksiyasını aydın şəkildə anlamalı və məhdudlaşdırıcı təcrübələrdən dərhal imtina etməlidir. Güclü Türkiyə və onun güclü ordusu güclü NATO və terrorla effektiv mübarizə deməkdir. “Ümid edirəm ki, bu prosesdə [F-16-nın satışı] konkret addımlar atılacaq”, – deyə o bildirib.
Türkiyə prezidenti Rəcəb Tayyib Ərdoğan daha əvvəl demişdi ki, amerikalı həmkarı Co Bayden onu telefon danışığında Ankaraya F-16 qırıcılarının satışına müsbət yanaşdığını və “müvafiq təklifi Konqresə təqdim etməyə hazır olduğunu” əmin edib. (Tass)