ABŞ və Qərb ölkələrinin İsrailə qeyd-şərtsiz dəstəyi onun Qəzza zolağında soyqırım törətməsinə şərait yaradıb və münaqişənin regionda genişlənmə riskini artırıb. Bunu Türkiyənin xarici işlər naziri Hakan Fidan Ankarada Kamboca xarici işlər naziri Sok Çenda Sophea ilə danışıqlardan sonra keçirdiyi mətbuat konfransında deyib.
“Bəzi Qərb ölkələrinin, xüsusən də ABŞ-ın İsrailin qeyd-şərtsiz dəstəyi olmasaydı, İsrail regionda soyqırımı başlada və davam etdirə bilməzdi. Rafah düşərgəsinə edilən son hücum İsrail qəddarlığının və onun yeni cinayətinin növbəti epizodu oldu, İsrail dayandırılmalı və qanun qarşısında cavab verməlidir”, – deyə Fidan bildirib.
Türkiyəli nazir Rəfaha endirilən zərbəni, eləcə də Rəfah keçid məntəqəsi ərazisində atışma nəticəsində misirli təhlükəsizlik zabitinin həlak olması ilə bağlı insidenti münaqişə risklərinin bütün regiona yayılmasının sübutu adlandırıb. “Biz əvvəllər dəfələrlə xəbərdarlıq etmişik ki, bu risk var, bunu Qəzzadakı hadisələr və Qırmızı dənizdəki vəziyyət sübut edir”. (Tass)