Türkiyə və İraqın Müdafiə nazirlikləri arasında hərbi, təhlükəsizlik və terrorla mübarizə sahələrində əməkdaşlıq memorandumu imzalanıb. Bu barədə Türkiyənin xarici işlər naziri Hakan Fidan Ankarada iraqlı həmkarı Fuad Hüseynlə danışıqların və iki ölkənin Müdafiə Nazirliyi və kəşfiyyat xidmətlərinin rəhbərlərinin iştirakı ilə yüksək səviyyəli təhlükəsizlik mexanizminin iclasının yekunlarına dair açıqlama verib.
“Ölkələrimizin müdafiə nazirləri hərbi sahədə, təhlükəsizlik və terrorizmlə mübarizə sahəsində əməkdaşlıq memorandumu imzalayıblar”, – deyə Fidan bildirib. Onun çıxışı Türkiyə Xarici İşlər Nazirliyinin X (keçmiş Twitter) səhifəsində yayımlanıb.
İki ölkə arasında yüksək səviyyəli təhlükəsizlik mexanizmi üçün koordinasiya mərkəzi aprel ayında Türkiyə prezidenti Rəcəb Tayyib Ərdoğanın İraqa səfərindən sonra yaradılıb. Mərkəzin vəzifələri arasında ümumi sərhədlərin qorunması və terrorizmlə mübarizə də var. (Tass)