Ankara Rusiya və Türkiyə parlamentləri arasında qarşılıqlı fəaliyyəti gücləndirməyə çağırır. Bunu TASS-ın baş direktorunun birinci müavini Mixail Qusmana müsahibəsində Türkiyə Böyük Millət Məclisinin (parlament) sədri Numan Kurtulmuş deyib.
O, xüsusilə, Rusiya Federasiyası Federasiya Şurası ilə Türkiyə Böyük Millət Məclisi arasında əməkdaşlıq üzrə beş il əvvəl yaradılmış xüsusi komissiyanın işində problemlərin aradan qaldırılmasının zəruriliyinə diqqət çəkib. “Son dövrdə bu komissiyanın işi o qədər də yaxşı getməyib. Əminəm ki, bu mexanizmlərin dirçəldilməsi və onların parlament və diplomatiya baxımından səmərəliliyinin artırılması hər iki ölkəyə fayda verəcək”, – deyə Kurtulmuş bildirib. (Tass)