Türkiyə Ukrayna münaqişəsinin həllinə hər cür töhfə verməyə hazırdır. Bu barədə Türkiyə Milli Təhlükəsizlik Şurasının prezident Rəcəb Tayyib Ərdoğanın sədrliyi ilə keçirilən iclasının yekunlarına dair bəyanatında deyilir.
“Görüşdə Türkiyənin Ukraynada daimi sülhün bərqərar olması üçün məsuliyyət daşımağa və bu prosesə hər cür töhfə verməyə hazır olduğu təsdiqlənib”, – sənəddə qeyd edilir.
İyulun 23-də İstanbulda Ukrayna nizamlanması üzrə birbaşa Rusiya-Ukrayna danışıqlarının üçüncü raundu keçirilib. Görüşdən əvvəl tam tərkibdə nümayəndə heyətlərinin rəhbərləri Vladimir Medinski və Rustem Umerov təkbətək söhbət ediblər. Danışıqlar tam həcmdə təxminən 40 dəqiqə davam edib, bu müddət ərzində tərəflər memorandum layihəsində nəzərdə tutulan mövqeləri müzakirə ediblər.
Görüşün yekununda tərəflər təkcə hərbi personalın deyil, mülki şəxslərin də mübadiləsi barədə razılığa gəliblər. Rusiya Ukraynaya siyasi, hərbi və humanitar məsələləri həll etmək üçün üç onlayn işçi qrupu yaratmağı təklif edib. Bundan əlavə, Moskva Kiyevə Ukrayna Silahlı Qüvvələrinin daha 3000 hərbçisinin cəsədini təhvil verməyi, həmçinin yaralıların və ölənlərin cəsədlərinin toplanması üçün cəbhə xəttində qısa humanitar fasilələrə qayıtmağı təklif edib.
Medinski bildirib ki, danışıqların dördüncü raundu ilə bağlı qərar yeni razılaşmalar həyata keçirildikdən sonra qəbul ediləcək.