İsrailin Qəzza zolağına hücumları kollektiv cəza şəklini alıb və o, onlara görə qanun qarşısında cavab verməlidir. Bunu Türkiyənin xarici işlər nazirinin müavini Əhməd Yıldız Haaqa Beynəlxalq Məhkəməsində İsrailin Fələstin ərazilərindəki hərəkətləri ilə bağlı dinləmələr çərçivəsində çıxışı zamanı deyib.
“Qəzza zolağında ən qanlı ilin şahidi oluruq. İsrailin hücumları kollektiv cəzaya çevrilib. Fələstinli mülki şəxslərə qarşı bu hücumlarda iştirak edən və günahkar olanların hamısı qanun qarşısında cavab verməlidir. Əks halda, bu, qaydalara əsaslanan beynəlxalq təşkilata böyük ziyan vuracaq-deyə Yıldız qeyd edib. Diplomatın çıxışı TRT telekanalı tərəfindən yayımlanıb.
Türkiyəli diplomat vurğulayıb ki, vəziyyətin həlli istiqamətində beynəlxalq ictimaiyyətin daha çox fəallığına ehtiyac var. “Mənəvi kompası və vicdanı olan hər kəs gecikmədən hərəkətə keçməlidir. Türkiyə də öz növbəsində sülh üçün hər şeyi etməyə hazırdır. Atəşkəs üçün yol açmaq lazımdır. Türkiyə bu məsələdə qarant mexanizmi yaratmaq təşəbbüsünü də öz üzərinə götürüb”, – Yıldız deyib.
O, İsrailin Fələstin ərazilərinin mülki əhalisinə qarşı hər hansı hərəkətini “heç bir halda qəbuledilməz” adlandırıb və Qəzzada “ibadət yerlərinə hücumların artdığını” qeyd edib. O xatırladıb ki, İsrailin Şərqi Qüdsün statusunun dəyişdirilməsi istiqamətində atdığı addımlar BMT Təhlükəsizlik Şurasının müvafiq qətnamələrini pozur və statusun dəyişdirilməsi cəhdləri Ankaranın kəskin rəddi ilə qarşılanmağa davam edəcək. (Tass)