“Türkologiya” beynəlxalq elmi jurnalının 2024-cü il üçün 1-ci nömrəsi çap olunub. Yeni nömrə Mahmud Kaşğarinin “Divanü lüğat-it-türk” əsərinin 950 illiyinə həsr edilib.
Bu barədə AZƏRTAC-a AMEA-nın Nəsimi adına Dilçilik İnstitutundan məlumat verilib. Jurnalda akademik İsa Həbibbəylinin “Mahmud Kaşğarinin “Divanü lüğat-it-türk” əsəri Azərbaycanda”, professor Nadir Məmmədlinin “Mahmud Kaşğarinin kimliyi və “Divanü lüğat-it-türk”ün yazıldığı dövr, akademik Möhsün Nağısoylunun “Divanü lüğat-it-türk” və “Kitabi-Dədə Qorqud”un Günbəd əlyazması ilə müqayisəli tədqiqi” sərlövhəli məqalələri, həmçinin Azərbaycan, Türkiyə, Özbəkistan və Makedoniya alimlərinin müxtəlif məqalələri yer alıb.
Fərqli elmi-nəzəri biliklərin türkologiya müstəvisində təqdim edən jurnalın bu nömrəsindəki “Divanü lüğat-it-türk- 950”, “Klassik irs”, “Dil əlaqələri”, “Dialektologiya”, “Personalia”, “Elmi həyat”, “Nekroloq” rubrikaları oxucular üçün maraqlı olacaq.
Jurnalın baş redaktoru Dilçilik İnstitutunun direktoru professor Nadir Məmmədli, məsul katibi filologiya elmləri doktoru Aysel Qəriblidir.