Ukrayna Müdafiə Nazirliyi hərbi idarənin rəisi Rustem Umerovun istefası ilə bağlı yayılan xəbərləri təkzib edib. Bu barədə “Hromadske” nəşri hərbi idarəyə istinadən məlumat yayıb.
Nəşr qeyd edir ki, sosial şəbəkə istifadəçiləri hərbi həkim komissiyalarının prosedurunda dəyişiklik edilməsi ilə bağlı Müdafiə Nazirliyinin əmrini nazir deyil, onun müavini İvan Qavrilyuk imzalamasına diqqət çəkiblər. Bununla bağlı Hromadske sorğu ilə Müdafiə Nazirliyi ilə əlaqə saxlayıb. Lakin nazirlikdən bildirilib ki, sərəncamda nazirin imzasının olmaması onun istefası demək deyil. Aprelin 27-də sərəncam imzalananda Umerov ezamiyyətdə idi və bu səbəbdən onun səlahiyyətlərini birinci müavini Qavrilyuk həyata keçirirdi.
Bundan əvvəl Ukraynanın bir neçə KİV-i, xüsusən də Zerkalo Nedeli hökumətdəki öz mənbələrinə istinadən Umerovun istefa verəcəyini və infrastruktur naziri Aleksandr Kubrakovu əvəzləyəcəyini yazmışdı.