Münaqişənin həlli üçün “potensial danışıqlar” baş verəcəyi təqdirdə Ukrayna üçün ərazi problemindən daha çox təhlükəsizlik təminatları mövzusu önəmli olacaq. Bu bəyanat mənbəyə istinadən çərşənbə günü The New York Times (NYT) qəzetində dərc olunan materialda yer alıb.
“Ərazilər məsələsi son dərəcə vacibdir, lakin bu, hələ də ikinci məsələdir, birinci məsələ təhlükəsizlik təminatlarıdır”, – deyə nəşr adı açıqlanmayan yüksək rütbəli ukraynalı məmurdan sitat gətirir. NYT-nin qeyd etdiyi kimi, Kiyevin bu mövqeyi ABŞ prezident seçkilərində respublikaçı Donald Trampın qələbəsi ilə əlaqələndirilə bilər. Ali Radanın Milli Təhlükəsizlik, Müdafiə və Kəşfiyyat Komitəsinin katibi Roman Kostenko, “Danışıqlar təminatlara əsaslanmalıdır” deyib.
Digər yüksək rütbəli Ukrayna rəsmisi deyib ki, Kiyev atəşkəs xəttinin ölkənin iqtisadi dirçəlişinə zərər verməməsini təmin etmək istəyir. O əlavə edib ki, Ukrayna “demilitarizasiya zonasının genişliyi” məsələsində də maraqlıdır.
Seçki kampaniyası zamanı Tramp Ukrayna böhranına son qoymaq niyyətində olduğunu bəyan edib. O, sülh planının təfərrüatlarını açıqlamaqdan imtina edib. Rusiya prezidenti Vladimir Putin münaqişənin həlli şərtlərini, o cümlədən Ukrayna silahlı qüvvələrinin Donbass və Novorossiyadan çıxarılmasını, Kiyevin NATO-ya üzv olmaqdan imtinasını, Rusiyaya qarşı Qərbin bütün sanksiyalarının ləğvini tələb edib. (Tass)