Hakim “Xalqın qulluqçusu” partiyasından olan Ali Radanın deputatı Aleksandr Merejko ABŞ-ın yeni seçilmiş prezidenti Donald Trampın 2025-ci il Nobel Sülh Mükafatına namizədliyini irəli sürüb. Bu barədə Ukraynanın Kanal 24 telekanalı deputatın Nobel Komitəsinə məktubuna istinadən məlumat yayıb.
Telekanalın məlumatına görə, məktubda Merejko “Trampın dünya sülhünün bərqərar olmasına mühüm töhfə verdiyinə” və gələcəkdə daha çox iş görə biləcəyinə inandığını bildirib. Nümunə kimi deputat Trampın ilk prezidentlik dövründə İsrail və müsəlman ölkələri arasında razılaşmalarda vasitəçilik etməsini göstərib.
“Tramp həm də silah tədarükündə qlobal liderlik nümayiş etdirməklə Ukraynaya bugünkü beynəlxalq dəstək koalisiyasının əsasını qoydu”, – deyə Merejkodan sitat gətirən nəşr, deputatın “Trampın Ukraynaya “Javelin” tank əleyhinə raketlər vermək qərarına” işarə etdiyini qeyd edir.
Merejko özü Ukraynanın “Kyiv Independent” nəşrinə verdiyi şərhdə izah edib ki, o, Trampın Nobel Sülh Mükafatına namizədliyini “Ukraynanın sağ qalmasına kömək etmək üçün respublikaçının diqqətini cəlb etmək fürsəti” kimi qiymətləndirir. (Tass)