Ukrayna Müstəqil Dövlətlər Birliyi çərçivəsində xüsusi təyinatlı təyyarələrin uçuşlarına dair sazişdən çıxmaq qərarına gəlib. Bu barədə hökumətin Ali Radadakı nümayəndəsi Taras Melniçuk teleqram kanalında məlumat verib.
“Milli təhlükəsizliyin təmin edilməsi, Ukraynanın milli maraqlarının, müstəqilliyinin, suverenliyinin və ərazi bütövlüyünün müdafiəsi üzrə tədbirlərin gücləndirilməsi məqsədilə Kiyev 1993-cü il yanvarın 22-də Minskdə imzalanmış xüsusi təyinatlı təyyarələrin uçuşlarının həyata keçirilməsinə dair sazişdən çıxır”. Melniçuk yazıb.
Saziş xüsusi təyinatlı təyyarələrin dövlət başçıları, Ali Şura sədrləri, hökumət başçıları və rəsmi dövlət və hökumət nümayəndə heyətləri ilə uçuşları əhatə edir.
Ukrayna hakimiyyəti mütəmadi olaraq Rusiya, Belarusiya, Suriya ilə, eləcə də MDB çərçivəsində bağlanmış müqavilələrdən çıxdığını elan edir. (Tass)