Ukrayna hakimiyyəti zədələnmiş 37 hərbi-sənaye kompleksi müəssisəsinin funksionallığının bərpası imkanlarını öyrənir. Bunu Ukraynanın Baş naziri Denis Şmıqal deyib.
“37 müəssisəyə ziyan dəyib. İndi biz onların bərpası üçün əlavə təkliflər üzərində işləyirik”, – Ukraynanın UNN agentliyi onun sözlərindən sitat gətirir.
Onun sözlərinə görə, Ukrayna Qərb ölkələrindən aldığı avadanlıqların bərpası üçün tərəfdaşlarla da əməkdaşlıq edir. “Bundan əlavə, biz Ukraynada silah, hərbi texnika, döyüş sursatı və onların elementlərinin istehsalı üçün qapalı dövrə yaratmaq üzərində işləyirik. Biz birgə müəssisələr və xidmət mərkəzləri yaradırıq ki, bu da Ukraynanın müdafiə-sənaye kompleksinin tədricən inteqrasiyasına kömək edəcək”, – Şmıqal əlavə edib.
Baş nazir həmçinin 2024-cü ildə hökumətin hərbi təyinatlı məhsulların istehsalına xərclərini 7 dəfə artıracağını qeyd edib. Eyni zamanda, gələn ilin büdcə layihəsində artıq 42 milyard dollara yaxın rekord kəsir nəzərdə tutulub. (Tass)
