Vladimir Zelenski daha əvvəl baş nazirin Avropa və Avro-Atlantik inteqrasiya üzrə müavini – ədliyyə naziri postunu tutmuş Olha Stefanişinanı Ukraynanın ABŞ-dakı səfiri təyin edib. Bu barədə o, axşam çıxışında bildirib.
İyulda Zelenski bildirib ki, Kiyev bu vəzifəyə Stefanişina təklif edib. Təsdiq prosesi davam edərkən o, ABŞ ilə əməkdaşlığın inkişafı üzrə xüsusi komissar kimi işləyirdi.
“Mən indicə Ukraynanın Amerika Birləşmiş Ştatlarında yeni səfiri olan Olha Stefanişina ilə danışdım. Rəsmi prosedurlar başa çatıb – bu gün mən səfirin təyin edilməsi haqqında fərman imzaladım. Səfirliyimizin işini yeniləmək üçün əsas vəzifələri müəyyən etmişəm. Əsas odur ki, Vaşinqtonla, müdafiə sektorunda prezident Trampla bütün razılaşmaları tam şəkildə həyata keçirək. Ukraynanın təhlükəsizliyinin uzunmüddətli təminatları Amerika ilə münasibətlərdən asılıdır”, – deyə Zelenski bildirib.
Onun sözlərinə görə, “masada Ukraynanın iki təklifi var – Ukrayna üçün silah müqaviləsi, ABŞ üçün müasir pilotsuz təyyarələr haqqında saziş”.
Zelenski Ukraynanın ABŞ-dakı səfiri postunu tutan Oksana Markarovaya işinə görə təşəkkür edib və onu “komandada olmağa davam etməyə” dəvət etdiyini qeyd edib. O, onun hansı vəzifəyə təyin olunacağını dəqiqləşdirməyib. (Tass)