Ukraynanın müdafiə naziri Rustem Umerov Baş Kəşfiyyat İdarəsinin (GUR) rəhbəri Kirill Budanovun razılığı olmadan iki müavinini işdən çıxarıb. Bu barədə “Ukrayinska Pravda” nəşri hərbi idarədəki mənbələrə istinadən məlumat yayıb.
Nəşrin məlumatına görə, Baş Kəşfiyyat İdarəsinin rəis müavinləri Viktor Zaitsev və İqor Ostapenko vəzifələrindən azad ediliblər.
Nazirin genişmiqyaslı kadr təmizləmələri planlaşdırdığı da iddia edilir. Xüsusilə, mənbələrdən birinə görə, Umerov 20-yə yaxın general və məmuru, o cümlədən beş nazir müavinini, Müdafiə Nazirliyinin dövlət katibini və Baş Qərargah rəisini “səmərəsizliyə görə” işdən çıxarmaq niyyətindədir və ya artıq işdən azad edib.
Eyni zamanda, “Ukrayinska Pravda”nın qeyd etdiyi kimi, internetdə prezident aparatının Budanovun özünü işdən çıxarmaq niyyətində olduğu barədə məlumatlar yayılıb. (Tass)