Mayın 10-da Polimer Materialları İnstitutunun Gənc Alim və Mütəxəssislər Şurası Ümummilli Lider Heydər Əliyevin anadan olmasının 101-ci ildönümünə həsr edilən tədbir keçirib.
Əvvəlcə Ulu Öndər Heydər Əliyevin əziz xatirəsi bir dəqiqəlik sükutla yad edilib.
İnstitutdan AZƏRTAC-a bildirilib ki, tədbirdə Poliefir və polikarbonat materiallar laboratoriyasının müdiri professor Ağa Mustafayev Ümummilli Liderin şərəfli ömür yolundan, milli dövlətçilik tariximizdəki misilsiz xidmətlərindən, müstəqil, suveren və hüquqi dövlət quruculuğu yolunda müstəsna fəaliyyətindən, Azərbaycanın xarici siyasətinin, iqtisadiyyat, təhsil, elm, mədəniyyət və s. sahələrinin inkişafında həyata keçirdiyi mühüm tədbirlərdən bəhs edib. O, dahi şəxsiyyətin ideyalarının daim yaşayacağını, gələcək nəsillərə örnək olaraq miras qalacağını vurğulayıb.
Tədbirdə institutun əməkdaşlarından Nurlanə Mirzəyeva, Fəridə Məmmədova və Cəvahir Adıgözəlova çıxışlarında Ümummilli Lider Heydər Əliyevin gənclərə daim qayğı ilə yanaşdığını, onların milli mənəvi dəyərlərə, eləcə də tarixi köklərə bağlı qalmalarına çalışdığını söyləyiblər.
Ulu Öndərin gənclər siyasətinin Prezident İlham Əliyev tərəfindən uğurla davam etdirildiyini deyən məruzəçilər son illərdə ölkəmizdə müvafiq dövlət proqramlarının qəbul edildiyini, xaricdə təhsil imkanlarının yaradıldığını vurğulayıblar.
