2023-cü il oktyabrın 7-dən bəri anklavda davam edən döyüşlər nəticəsində BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyinin (UNRWA) Qəzza zolağındakı məktəblərinin təxminən 70%-i dağıdılıb və ya zədələnib. Bu barədə agentliyin komissarı Filip Lazzarini X (keçmiş Twitter) səhifəsində məlumat verib.
“Qəzzada məktəblərimizin 70%-dən çoxu dağıdılıb və ya zədələnib. Məktəblərimizin böyük əksəriyyəti indi yüz minlərlə köçkün ailənin yaşadığı sığınacaqlara çevrilib. Onlardan təhsil üçün istifadə etmək olmaz”, – Lazzarini bildirib.
Qəzza hakimiyyətinin mətbuat xidmətinin Telegram kanalında dərc etdiyi son məlumatlara görə, zolağın bütün eskalasiyası dövründə 122 təhsil müəssisəsi tamamilə dağıdılıb, daha 334-ü isə atəşə tutulub. (Tass)