Saytlarda aparılan monitorinq zamanı 4500 dil faktı aşkar olunub və onun 3564-ü hesabata daxil edilib.
AZƏRTAC xəbər verir ki, bunu Dövlət Dil Komissiyası yanında Monitorinq Mərkəzinin dekabrın 4-də keçirilən “Saytlarımız monitorinq aynasında” adlı tədbirdə çıxış edən Mərkəzin şöbə müdiri Vəfa İsmayılova söyləyib. O, aşkar edilmiş dil faktlarından 1371-nin orfoqrafik, 356-sının leksik, 909-nun qrammatik norma pozuntusu, 928-nin üslub və ifadə səhvi olduğunu bildirib. Şöbə müdiri əvvəlki monitorinqlə müqayisədə müəyyən irəliləyişlərin olmasına baxmayaraq, ədəbi dil normalarının pozulması hallarına hələ də çox rast gəlindiyini təəssüflə qeyd edib.