Çinin xarici işlər naziri Van Yi və ABŞ dövlət katibi Antoni Blinken Pekində keçirilən görüşdən sonra Çin-Amerika münasibətlərinin sabitləşməsinə və inkişafına kömək etməyə davam etmək barədə razılığa gəliblər. Bu barədə Çin Xarici İşlər Nazirliyinin bəyanatında deyilir.
“Hər iki tərəf iki dövlət başçısının göstərişlərinə uyğun olaraq Çin-ABŞ münasibətlərini sabitləşdirmək və inkişaf etdirmək üçün səylə işləməyə davam etmək barədə razılığa gəliblər”, – deyə departamentin saytında yerləşdirilən bəyanatda deyilir.
Sənəddə bildirilir ki, tərəflər 2023-cü ilin noyabrında San-Fransiskoda iki ölkə liderlərinin görüşündən sonra müxtəlif sahələrdə əldə edilmiş irəliləyişi təsdiqləyiblər. Tərəflər həmçinin bütün səviyyələrdə, o cümlədən diplomatiya, iqtisadiyyat, maliyyə, ticarət, iqlim və hərbi sahələrdə mübadilə və təmasları davam etdirmək barədə razılığa gəliblər. (Tass)