Qanunsuz erməni silahlı birləşmələrinin tərkibində 1991-ci il dekabrın 22-də Xocalı rayonunun Meşəli kəndində soyqırımı törətməkdə təqsirləndirilən Vaqif Xaçatryanın məhkəməsində zərərçəkmiş şəxs qismində tanınan Müdafiə Nazirliyinin sabiq hərbi qulluqçusu, gizir Hüseynov Çingiz ifadə verib.
“Report”un məlumatına görə, o, ifadəsində göstərib ki, Qarabağ və ətraf rayonlarda milli zəmində ermənilərlə başlanmış döyüş əməliyyatlarında iştirak etmək üçün 1991-ci ilin noyabr ayında könüllü olaraq 10 nəfər döyüşçü ilə birlikdə helikopterlə Meşəli kəndinə göndərilib:
“1991-ci il səhər saat 7 radələrində xeyli sayda erməni silahlıları hər tərəfdən Meşəli kəndini mühasirəyə alıb mikrofonla Azərbaycan dilində bir neçə dəfə “Sizə toxunmayacağıq, təslim olun, kənddən çıxın gedin!” sözlərini demiş, kənddən heç kimin getmədiyini görüb hücuma başlayıblar. Hücum zamanı məktəbin binasında olan döyüşçülər çölə çıxarkən sonuncu olan leytenant Kamil Eyyubovu ermənilər güllə ilə vurub öldürdü. Bundan başqa, kəndin o biri başında olan postda döyüşən Musa Qonaqov da başından snayper gülləsi ilə vurularaq öldürüldü, özüm isə sağ ayağımdan güllə yarası aldım. Eləcə də yanımda qumbaranın partlamasi nəticəsində boynumdan, bədənin sağ hissəsindən və sağ ayağımdan qəlpə yaraları almışam”.