Serbiya prezidenti Aleksandar Vuçiç böyük dövlətləri əvvəlcə Ukrayna və Yaxın Şərqdəki münaqişələrin sülh yolu ilə həllinə nail olmağa, yalnız bundan sonra iqlim dəyişikliyi ilə mübarizə məsələləri ilə məşğul olmağa çağırıb.
“Bəli, biz daşqınlar, quraqlıqlar, meşə yanğınları, hava və suyun çirklənməsi və başqa hər şeylə mübarizə aparmalıyıq, lakin bundan əvvəl sülh bərqərar etməliyik və buna görə də mən bütün böyük dövlətləri Ukraynada, Yaxın Şərqdə və bütün dünyada problemləri həll etməyə çağırıram”, – o, Bakıda BMT-nin İqlim Dəyişikliyi üzrə Çərçivə Konvensiyasına (COP-29) tərəflərin konfransında bildirib.
Serbiya liderinin sözlərinə görə, bu gün heç kim “sülh” sözünü bəyənmir, çünki hamı “bir-birini məğlub etmək və qarşı tərəfin məğlubiyyətini görmək istəyir”. Vuçiçin vurğuladığı kimi, bütün ölkələr “sülhə daha çox sərmayə qoymalıdırlar”, əks halda iqlim dəyişikliyi ilə mübarizə aparmaq əvəzinə, resursları silahlara xərcləməyə məcbur olacaqlar. (Tass)