Moskvada Rusiya lideri Vladimir Putinlə danışıqlardan sonra Serbiya prezidenti Aleksandr Vuçiç serb jurnalistlərə bildirib ki, danışıqlar açıq və səmimi formatda keçib. Balkan respublikasının rəhbəri onların nəticələrindən məmnunluğunu bildirib və göstərilən hörmətə görə Rusiya prezidentinə təşəkkür edib.
“Rusiya Federasiyasının Prezidenti Vladimir Vladimiroviç və onun ən yaxın ətrafı ilə uzun, açıq və səmimi söhbətimiz oldu. Biz bütün mövzular haqqında danışdıq”, – Vuçiç qeyd edib.
“Biz Serbiya və Rusiya arasında ikitərəfli əməkdaşlığın bütün aspektlərini müzakirə etdik. Danışıqların nəticələrindən, prezident Putinin Serbiya nümayəndə heyətini qəbul etməsindən, eləcə də Serbiyaya göstərdiyi hörmətdən məmnunam.
Serbiya lideri onu da vurğulayıb ki, danışıqlar zamanı Rusiyanın Balkan respublikasına enerji təchizatı məsələsinə xüsusi diqqət yetirilib. “Biz həmçinin rusiyalı dostlarımızla qaz tədarükü məsələsində yeni uzunmüddətli müqavilə bağlamaq barədə danışdıq. Hazırda bu, Serbiyada ümumi qaz istehlakının təxminən 85%-ni əhatə edir və biz bu gün danışıqlara başladıq – mən və prezident Putin. Yaxın gələcəkdə mütəxəssislərimiz bu uzunmüddətli müqaviləni hazırlamağa başlayacaqlar”, – o qeyd edib. (Tass)