Ötən 2024-cü il tarixdə ən isti il olub. Bunu BMT-nin ixtisaslaşmış qurumu olan Ümumdünya Meteorologiya Təşkilatının (WMO) nümayəndəsi Kler Nullis Cenevrədə keçirdiyi brifinqdə deyib.
Onun sözlərinə görə, müvafiq nəticələrlə hesabat gün ərzində dərc olunacaq. O qeyd edib ki, təşkilat tərəfindən ilk olaraq 2023-cü il, indi isə 2024-cü il ən isti kimi tanındığı tendensiya iqlim dəyişikliyi ilə bağlıdır. Nullis əlavə edib ki, 2023-cü ilin sonu və 2024-cü ilin əvvəllərində baş verən təbii El Nino fenomeni vəziyyəti daha da pisləşdirib.
Yerdəki iqlim və hava əsasən iki iqlim hadisəsinin vəziyyətindən asılıdır – El Niño və La Nina (İspan dilində “oğlan” və “qız”). Birincisi, Sakit Okeanın mərkəzi və şərq bölgələrində suyun yuxarı qatının kəskin istiləşməsi, ikincisi isə onların temperaturunun azalması ilə bağlıdır. El Niño və La Niña bir neçə ildən bir bir-birini əvəz edir ki, bu da atmosferdə okean axınlarının və küləklərin sirkulyasiyasında nəzərəçarpacaq dəyişikliklərə səbəb olur. Belə yerdəyişmələr vaxtaşırı Yer kürəsinin bəzi bölgələrində quraqlığa, digərlərində isə güclü yağışlara səbəb olur. Məsələn, Avstraliyada Minilliyin Quraqlığı (1996-2010) keçən əsrin sonunda qeyri-adi güclü El Nino tərəfindən törədilib. Yalnız La Ninanın yeni mərhələsi başlayandan sonra başa çatdı. (Tass)