Fövqəladə Hallar Nazirliyinin Şimal Regional Mərkəzi Xaçmaz rayonunun məktəbliləri üçün “Konstitusiya və Suverenlik İli” çərçivəsində “Gələcəyin xilasediciləri” devizi altında “Açıq qapı” günü keçirib.
Nazirliyin mətbuat xidmətindən AZƏRTAC-a verilən məlumata görə, tədbirin keçirilməsində məqsəd məktəblilərin hərtərəfli inkişafı, fiziki və mənəvi cəhətdən sağlam yetişməsi, onlarda təhlükəsiz həyat fəaliyyəti mədəniyyətinin formalaşdırılmasına dəstək, habelə nazirliyin müvafiq qurumlarının fəaliyyəti ilə tanışlıq olub.
Tədbirdə əvvəlcə Ümummilli Lider Heydər Əliyevin büstü önünə gül dəstələri qoyulub, əziz xatirəsi ehtiramla yad edilib. Azərbaycan Respublikasının Dövlət Himni səsləndirilib, Ümummilli Liderin və şəhidlərimizin əziz xatirəsi bir dəqiqəlik sükutla yad edilib.
Şimal Regional Mərkəzinin rəisi polkovnik Fuad İlyasov çıxışında belə tədbirlərin əhəmiyyətindən danışıb. Qeyd olunub ki, Ulu Öndər Heydər Əliyev uşaqların sağlam, firavan, xoşbəxt yaşaması, onların hərtərəfli inkişafı naminə daim məqsədyönlü tədbirlər həyata keçirib, həmin siyasət Prezident, Müzəffər Ali Baş Komandan İlham Əliyev tərəfindən bu gün də uğurla davam etdirilir.
“Açıq qapı” gününün yekununda uşaqlar FHN-in yerli qurumlarının texniki imkanları ilə tanış olub, onları maraqlandıran suallar cavablandırılıb.