ABŞ və Böyük Britaniyanın Yəməndə üsyançı Husi Ənsar Allah hərəkatının hədəflərinə endirdiyi zərbələr nəticəsində bu ilin yanvarından bəri ən azı 55 nəfər həlak olub. Bunu qiyamçıların lideri Abdel Malik əl-Husi deyib.
“2024-cü il yanvarın 12-də ölkəmizə qarşı təcavüzün başlanmasından bəri Amerika və Britaniya silahlı qüvvələri 487 zərbə endirib, 55 nəfər ölüb, 78 nəfər yaralanıb”, – husi lideri çıxışını Əl Məsirə telekanalı ilə yayımlayıb.
Qəzza zolağında münaqişənin şiddətlənməsindən sonra Ənsar Allah xəbərdarlıq edib ki, İsraili atəşə tutacaq və Fələstin anklavında əməliyyatlar dayandırılana qədər əlaqəli gəmilərin Qırmızı dəniz və Bab əl-Məndəb boğazı sularından keçməsinə icazə verməyəcək. Ötən ilin noyabrından husilər Qırmızı dəniz və Ədən körfəzində onlarla mülki gəmiyə hücum ediblər.
“Ənsar Allah”ın hərəkətlərinə cavab olaraq, Amerika hakimiyyəti Qırmızı dənizdə naviqasiya azadlığını təmin etmək və gəmiləri qorumaq üçün beynəlxalq koalisiyanın yaradılması və əməliyyata başladığını elan edib. Bundan sonra Böyük Britaniya və ABŞ silahlı qüvvələri mütəmadi olaraq Yəmənin müxtəlif əyalətlərində üsyançıların hərbi obyektlərinə zərbələr endirməyə başlayıb. (Tass)