Azərbaycana misilsiz nailiyyətlər qazandıran Heydər Əliyev siyasətinin zirvə nöqtəsi 30 il ərzində Ermənistanın işğalı altında qalmış torpaqlarımızın azad edilməsi, ərazi bütövlüyünün bərpası və suverenliyin bərqərar olunmasıdır.
AZƏRTAC xəbər verir ki, bu fikirləri Yeni Azərbaycan Partiyası (YAP) Sədrinin müavini – Mərkəzi Aparatın rəhbəri Tahir Budaqov “Heydər Əliyev: Müstəqil Azərbaycanın beynəlxalq münasibətlər sisteminə inteqrasiyasında Ümummilli Liderin rolu” mövzusunda oktyabrın 25-də keçirilən onlayn konfransda səsləndirib.
YAP sədrinin müavini vurğulayıb ki, istər Ulu Öndər Heydər Əliyevin, istərsə də Prezident İlham Əliyevin siyasi kursunda Qarabağ məsələsinin həlli başlıca strateji prioritet idi.
“Azərbaycanın qazandığı möhtəşəm nailiyyətlər Heydər Əliyev siyasətinin təntənəsidir. Azərbaycan bundan sonra da Prezident, Müzəffər Ali Baş Komandan, Yeni Azərbaycan Partiyasının Sədri İlham Əliyevin rəhbərliyi ilə Heydər Əliyev yolunda addımlayaraq möhtəşəm uğurlar və yeni qələbələr əldə etmək əzmindədir”, – deyə Tahir Budaqov vurğulayıb.