Yaponiya hakimiyyəti Çinin hərbi fəaliyyətinin, o cümlədən Pekin və Moskva arasında əməkdaşlıq çərçivəsində fəallaşmasından ciddi narahatdır. Bunu Yaponiyanın xarici işlər naziri Yoko Kamikava Cənubi Koreyanın Busan şəhərində çinli həmkarı Vanq Yi ilə danışıqlar zamanı deyib.
“Nazir Şərqi Çin dənizindəki, o cümlədən [mübahisəli] Senkaku adaları, habelə Çinin Yaponiya yaxınlığında, o cümlədən Rusiya ilə əməkdaşlıq çərçivəsində hərbi fəaliyyətinin intensivləşməsi ilə bağlı ciddi narahatlığını ifadə edib”, – Yaponiya Xarici İşlər Nazirliyinin bəyanatında deyilir. Digər müzakirə mövzusu KXDR ətrafında vəziyyət, o cümlədən Yaponiya vətəndaşlarının qaçırılması problemi olub.
Bundan əlavə, Kamikava “Tayvan boğazında sülh və sabitliyin vacibliyini qeyd etdi və [casusluqda şübhəli bilinərək] saxlanılan Yaponiya vətəndaşlarının vaxtından əvvəl azad edilməsini qətiyyətlə tələb edib. Eyni zamanda, tərəflər “müvafiq sahədə əməkdaşlığı gücləndirmək üçün təhlükəsizlik məsələləri üzrə Yaponiya-Çin dialoqunu mümkün qədər tez keçirməyə razılaşıblar”.
Yaponiyalı nazir Çin tərəfini zədələnmiş “Fukusima-1” AES-dən suyun Sakit okeana axıdılması ilə əlaqədar Yaponiyadan ərzaq idxalına qoyulan məhdudiyyətləri dərhal aradan qaldırmağa çağırıb. Görüş iştirakçıları “bu məsələ ilə bağlı iki dövlətin mövqeləri arasında uçurum olduğunu” qəbul edərək, konstruktiv şəkildə məsləhətləşmələr və dialoq yolu ilə bu problemin həllinin yolunu tapmağa razılaşıblar. (Tass)