Yaponiya hökuməti Fransa ilə yeni təhlükəsizlik sazişi üzrə danışıqlara başlamağı planlaşdırır ki, bu da, xüsusən də təlimlər üçün bir-birinin ərazilərinə sadələşdirilmiş hərbi çıxış, habelə təbii fəlakətlər zamanı yardım haqqında sazişi əhatə edəcək. Bu barədə Kyodo agentliyi məlumat yayıb.
Yaponiyanın baş naziri Fumio Kişidanın çərşənbə günü başlayan tur çərçivəsində səfər edəcəyi Fransaya səfəri zamanı Fransa prezidenti Emmanuel Makronla danışıqlarda bu mövzunu gündəmə gətirməyi planlaşdırdığı gözlənilir.
Yaponiya bu yaxınlarda tərəfdaşları ilə Asiyada təhlükəsizlik əlaqələrini gücləndirmək səylərini artırıb. Yerli müşahidəçilərin fikrincə, bu addımlar Çini cilovlamaq məqsədi daşıyır. Yaponiyanın Avstraliya və Böyük Britaniya ilə sadələşdirilmiş hərbi çıxışa dair oxşar sazişləri var, Tokio isə Manila ilə oxşar saziş üzrə danışıqlar aparır.
Fransanın Yeni Kaledoniya da daxil olmaqla, xaricdəki ərazilərinə görə Asiyada strateji maraqları var. Tokio və Paris artıq iki ölkənin hərbçiləri arasında ərzaq, yanacaq və sursat paylanmasını sadələşdirmək üçün təhlükəsizlik sazişinə malikdir. (Tass)
