Yaponiyanın müdafiə şirkətləri amerikalı tərəfdaşlarla birlikdə Patriot raketdən müdafiə sistemləri üçün raket istehsalına başlaya bilər. Bu barədə Nikkei qəzeti məlumat yayıb.
Qeyd olunur ki, bu fikir Yaponiya və ABŞ-ın müdafiə komplekslərinin nümayəndələri arasında Tokioda keçirilən danışıqlarda müzakirə olunub. O, Yaponiya ərazisində raketlərin, o cümlədən Patriot sistemləri üçün raketlərin Yaponiya-Amerika birgə istehsalını nəzərdə tutur.
Danışıqlar nəticəsində tərəflər müdafiə sektorunda, o cümlədən silah istehsalı və texniki xidmət sahəsində əməkdaşlığın genişləndirilməsi məsələlərini daha da müzakirə etmək üçün işçi qrupların yaradılması barədə razılığa gəliblər. Tokio və Vaşinqton arasında ikitərəfli müdafiə əməkdaşlığının digər sahəsi Yaponiyada Amerika gəmi və təyyarələrinin yenidən təchiz edilməsi və modernləşdirilməsi olmalıdır.
Yaponiyanın baş naziri Fumio Kişida və ABŞ prezidenti Co Bayden 2024-cü ilin aprelində müdafiə sektorunda ikitərəfli əməkdaşlığı genişləndirmək üçün danışıqlara başlamaq barədə razılığa gəliblər. Artıq Tokio və Vaşinqton tərəfindən bu mövzuda müxtəlif səviyyələrdə məsləhətləşmələrin müntəzəm olaraq keçiriləcəyi gözlənilir. (Tass)