ABŞ və İsrail arasında münasibətlər bölgədəki münaqişə nəticəsində xeyli pisləşib. Bu barədə Washington Post yazır .
Nəşrin yazdığına görə, ABŞ prezidenti Co Bayden son bir il ərzində dəfələrlə İsrailin baş naziri Benyamin Netanyahuya müraciət edərək “taktiki hərbi və siyasi qələbələrə deyil, sülh nizamlanmasına dair strateji plana diqqət yetirməyə” çağırıb. Qeyd olunur ki, amerikalı lider açıq çıxışlarında və şəxsi söhbətlərində İsrailin baş nazirini “yəhudi xalqının qisas almaq istəyini artırmamağa, təmkinli olmağa” çağırıb. Bununla belə, Netanyahu ABŞ-ın həm Qəzza zolağında, həm də Livanda atəşkəslə bağlı çağırış və təkliflərini açıq şəkildə rədd edərək, Ağ Evi silah tədarükünü yavaşlatmaqda günahlandırıb. Qəzza zolağında saxlanılan girovların azad edilməsi ilə bağlı danışıqların gedişi ilə tanış olan adı açıqlanmayan rəsmilərin qəzetə verdiyi məlumata görə, həm İsrailin baş nazirinin, həm də radikal Fələstinin HƏMAS hərəkatının yeni tələbləri səbəbindən müzakirələr dəfələrlə kəsilib.
Nəşrin həmsöhbətləri iddia edirlər ki, İsrail dəfələrlə Qəzzaya humanitar yardımın çatdırılmasını əngəlləyib və ya gecikdirib, eyni zamanda bunu açıq şəkildə inkar edib. Mənbələr vurğulayır ki, Vaşinqtonun təzyiqi olmasaydı, yəhudi dövləti “minimum yardımın belə çatdırılmasına icazə verməzdi”. Bundan əlavə, İsrail ABŞ-ın təhlükəsizlik zəmanətlərindən yararlanaraq, Amerika müttəfiqlərini əvvəlcədən xəbərdar etmədən İordan çayının qərb sahilində, Suriya və İranda hücumlar həyata keçirib. (Tass)