Ailə, Qadın və Uşaq Problemləri üzrə Dövlət Komitəsinin təşkilatçılığı ilə Qəbələ rayonunda jurnalistika ixtisası üzrə təhsil alan tələbələr üçün təşkil edilən “Ailə, qadın və uşaq məsələləri mediada” mövzusu üzrə Yay Təlim Proqramının iştirakçıları komitənin Qəbələ Uşaq və Ailələrə Dəstək Mərkəzində olublar.Qurumdan AZƏRTAC-ın bölgə müxbirinə bildirilib ki, mediatur zamanı gənc jurnalist kadrlar mərkəzdə göstərilən xidmətlərlə tanış olaraq, icmadaxili xidmətlər və əhali ilə aparılan işlər haqqında məlumat əldə ediblər.Mərkəzin direktoru Günel Ağayeva ayrı-ayrı xidmət otaqları və həyata keçirilən tədbirlər barədə tələbələrə məlumat verib. O, mərkəzin fəaliyyət istiqamətlərinə uyğun olaraq, psixoloji və pedaqoji dəstək, fərdi məşğələ, sosial iş, treninq və seminarlar haqqında məlumatları diqqətə çatdırıb. Tələbələr, həmçinin mərkəzin təlim və konfrans otaqları, asudə vaxtın təşkili məqsədilə ailə klubu və digər texniki otaqlarla tanış olublar.Daha sonra komitənin təşəbbüsü ilə yaranan Uşaq Səfirlər Məclisinin Qəbələ üzrə nümayəndələri tələbələrə uşaq hüquqlarının müdafiəsi istiqamətində rayondakı fəaliyyətləri və həyata keçirdikləri layihələr barədə məlumat veriblər.Qeyd edək ki, 29 iyul – 2 avqust 2024-cü il tarixlərində Qəbələdə keçirilən Yay Təlim Proqramında ali təhsil müəssisələrində jurnalistika ixtisası üzrə təhsil alan III-IV kurs bakalavr tələbələri iştirak edirlər.
