Azərbaycan Könüllü Təşkilatları İttifaqı qarşıdakı dövr üçün böyük missiya və hədəflərə sahibdir. Bu hədəflər beynəlxalq əlaqələrin gücləndirilməsi və yerli layihələrin yüksək səviyyədə həyata keçirilməsini əhatə edir. Növbəti dövr üçün ittifaq dövlətçilik ənənələrinə sadiq qalaraq strateji məqsədlər əsasında fəaliyyət göstərəcək və Azərbaycan gəncliyinin inkişafı üçün mühüm addımlar atacaq.
AZƏRTAC xəbər verir ki, bu sözləri Azərbaycan Könüllü Təşkilatları İttifaqının yeni sədri Vüqar Əliyev jurnalistlərə açıqlamasında deyib.
V.Əliyev xatırladıb ki, noyabr ayında Azərbaycanda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) keçiriləcək: “Bu mötəbər tədbirdə Azərbaycan könüllüləri fəal iştirak edəcəklər. Onlar ölkəmizə gələn qonaqların qarşılanması və müxtəlif dəstək xidmətlərinin göstərilməsində mühüm rol oynayacaqlar”.