Yeni Zelandiya Birləşmiş Millətlər Təşkilatının Yaxın Şərqdəki Fələstinli Qaçqınlara Yardım və İşlər üzrə Agentliyinin (UNRWA) maliyyələşdirilməsini müvəqqəti dayandırdığını elan edib. Ölkənin baş naziri Kristofer Lakson müvafiq bəyanatla çıxış edib.
Onun sözlərinə görə, Yeni Zelandiya “Xarici işlər naziri [Winston Peters] agentliyin HƏMAS hücumlarında iştirakı ilə bağlı izahatından razı qalmayana qədər UNRWA-ya əlavə ödəniş etməyəcək”. “UNRWA əməkdaşlarına qarşı iddialar inanılmaz dərəcədə ciddidir və onların düzgün şəkildə araşdırılması vacibdir. Yeni Zelandiya xarici işlər naziri əks göstəriş verənə qədər biz töhfə verməyəcəyik”, – Lakson jurnalistlərə deyib.
Baş nazir Yeni Zelandiyanın UNRWA-ya illik töhfəsinin 1 milyon Yeni Zelandiya dolları (613 min dollar) olduğunu və bu vəsaitin sonradan ölkənin Beynəlxalq Qırmızı Xaç Komitəsinə ayırdığı 10 milyon Yeni Zelandiya dollarına (6,1 milyon dollar) əlavə ediləcəyini açıqlayıb. (Tass)