Vladimir Zelenski həm sülh, həm də müharibə dövründə Ukrayna Təhlükəsizlik Xidmətinin (SBU) işçilərinin sayını əhəmiyyətli dərəcədə artıran qanunu imzalayıb. Bu barədə Ali Radanın saytında məlumat verilib.
Qeyd olunur ki, qanun dərc edildiyi gündən sonrakı gün qüvvəyə minir. SBU iki ay müddətində qanunun icrası üçün zəruri olan müvafiq aktlara əlavə və dəyişikliklərlə bağlı təkliflər verməlidir.
Daha əvvəl Avropa Həmrəyliyi fraksiyasının deputatı İrina Geraşenko bildirmişdi ki, qanun sülh dövründə SBU işçilərinin ümumi sayının 27 mindən 37 minə, xüsusi dövrdə isə 31 mindən 41 minə qədər artırılmasını nəzərdə tutur.
Bundan başqa, qanun qüvvəyə mindikdən sonra SBU-nun əməkdaşları müdafiə tapşırıqlarını yerinə yetirərkən silah və hərbi texnikadan istifadə etmək hüququ qazanacaq və terrorla mübarizə bölməsi “A” Xüsusi Əməliyyat Mərkəzi ilə əvəz olunacaq. O, əməliyyat və döyüş fəaliyyətini həyata keçirəcək və ən azı 10 min nəfəri olmalıdır.