Azərbaycan Milli Elmlər Akademiyasının (AMEA) Şəki Regional Elmi Mərkəzinin (REM) və Dini Qurumlarla İş Üzrə Dövlət Komitəsinin Şəki regional bölməsinin birgə təşkilatçılığı ilə “Dinlər sülhə, qarşılıqlı anlayışa çağırır” mövzusunda tədbir keçirilib. Tədbir “Konstitusiya və Suverenlik İli” çərçivəsində təşkil edilib.
AMEA-dan AZƏRTAC-a bildirilib ki, Şəki REM-in elmi işlər üzrə direktor müavini Kamil Adışirinov
tədbirin keçirilməsində əsas məqsədin İslam həmrəyliyinin gücləndirilməsi, sülhə çağırış istiqamətində insanların maarifləndirilməsi olduğunu deyib.
Sonra Dini Qurumlarla İş üzrə Dövlət Komitəsinin Şəki regional bölməsinin aparıcı məsləhətçisi Saleh Məmmədov çıxış edərək Azərbaycanda digər dinlərin nümayəndələrinə tolerant münasibətdən, müsəlmanlar arasındakı həmrəylikdən, ortaq dəyərlərdən, dinlərarası dialoqun əhəmiyyətindən danışıb. O, həmçinin BMT-nin və dini liderlərin çağırışları, 1986-cı ildə keçirilmiş Vatikan konfransı, UNESCO layihələri barədə məlumatları diqqətə çatdırıb.
Şəki REM-in Tarix və epiqrafika şöbəsinin böyük elmi işçisi Ələddin Sultanov çıxışında dini radikalizmə, fanatizmə, terrorizmə qarşı mübarizədə tədbirin əhəmiyyətli rolu olduğunu vurğulayıb.
Daha sonra Şəki şəhər mərkəzi Cümə məscidinin imamı Müşfiq Xəlilovun “Bütün dinlər sülhə çağırır” mövzusunda məruzəsi dinlənilib.